Market Insight：乳品股仍有水位

今年美國聯儲局尚有兩次議息，會唔會提出減少買債開始退市第一步？古勝估機會仲應低於五成。由五月中開始，伯老提出退市言論，美國按揭息率跟隨債息回升，近月樓市銷售數據開始見放緩趨勢，就業市場就不過不失，今年美國通脹維持1至2%之間低於通脹目標，亦比一一及一二年低，顯示三次QE對拉動通脹的直接關係並不明顯，加埋九月聯儲局議息，刻意示人以弱，調低今明兩年經濟增長預測至2.15%及3%。

退市暫時得個講字

與此同時，伯南克又做埋一月講拜拜，無理由開完退市第一槍，就由下任主席執手尾，萬一今年第四季同明年首季美國經濟又再轉弱，對聯儲局公信力將構成沉重打擊。另美匯指數終於跌穿80的心理關口，返回二月初水平，由七月高位84.75計，美匯兌一藍子貨幣累積貶值5.7%，一路驚退市美元卻一路跌，似乎匯商認定最後得個講字，美鈔會源源不絕繼續供應。

古勝冇點你 2013/10/04

萬里長空

美國財政談判搞到部分政府部門拉閘，港股好少理，連挾兩日，昨日再升229點報23,214點，兩日加埋升咗355點，返回上周五收市價之上，可惜主板成交唔多，得532億元，仲要加埋超購王雲遊（00484）及半新股輝山乳業（06863）近41億成交先有五字頭。四叔將手上直接持有的煤氣（00003）、香港小輪（00050）、恒基發展（00097）以及美麗華（00071），以大約30億元注入恒基地產（00012），四叔本身揸62.69%恒地，今次左袋過右袋，會計上實際套現10億左右。

輝山短線鑊氣充足

簡化控股結構，較合理揣測是四叔為分身家鋪路，注入項目等於恒地資產值約1.4%，對後者影響有限，反而恒地小股東要以23倍市盈率，唔算平嘅估值接四叔手煤氣，心裏面可能有些少唔舒服。殼股恒發幾年唔發市，一發當幾年，今次股份轉讓，對佢有乜好處？只有四叔至知！

到底係一孩政策有聲氣逐步放寬？中央重點扶持內地乳企整頓行業，抑或中國人突然飲多咗牛奶少飲茶？今年內地原乳價格漲唔停，年初至今累積升6%，按年更大升13%，一眾乳業相關股份統統爆發，潛水艇輝山強勢重返水面，一升就10.3%報2.78元，預期市盈率18至19倍，比蒙牛（02319）平，加埋一條龍由養草、養乳牛到生產乳製品，上市前睇過大行分析話其原乳每升價1%，其收入會有等值增幅，加埋上市後低位收乾貨，炒佢合情合理。

此外，主攻上游業務的現代牧業（01117），亦肯定受惠，一四年20.9倍PE，在天價乳業股中應有水位。中糧入股後，變成半隻國企的蒙牛脫胎換骨，單係睇中央扶持乳業消息前，先部署入股上游現牧，再買埋嬰兒奶粉股雅士利（01230），盡顯早着先鞭，五月由22元樓下起步，完美直線升浪，想等位入貨真難，一三年32倍PE，惟有抱貴買貴賣心態。

雅士利公眾持股量不足，拉閘個半月，期間合生元（01112）累積升四成九，揸住的股東等派彩也。最睇唔透合生元，唔計反壟斷被罰，估計今年賺9.9億元人仔，32.5倍PE，昨日創64.5元上市新高，短期升勢唔似會停，但要60元樓上衝入去，情願短炒現牧及輝山。

舜宇光學謀定後動

昨日中資電訊類股份表現突出，受工信部或調整網間結算費的消息影響，中移（00941）逆市跌0.6%，但中電信（00728）及聯通（00762）則分別升7%及8%，成交大增；電訊設備股中興通訊（00763）升近半成；TCL通訊（02618）急升13%；另京信通信（02342）及中國無線（02369）分別升4.3%及1.9%。上月有配售行動的舜宇光學（02382），基本上守住配股價8.06元，昨日收報8.18元，本來都可以小注一試博開車，惜見近日10日線失守50日線，穩陣起見，宜待股價重上50日線8.46元樓上始考慮追入。

古勝