唔少金融業人士都羨慕投資銀行嘅工作，覺得係高薪厚職福利多，生活高檔又有品味。不過最近絲絲收到份「高盛非官方男人指南」，透露咗投行人嘅生活態度，睇完之後，你會唔會有新嘅睇法呢？
呢份指南係由署名GS Elevator同John Carney所寫嘅，二人聲稱專門揭露高盛嘅八卦事件。指南列出近70件男人應該要做嘅事情，有啲都幾正氣，例如：「唔好再提自己出身邊間名牌大學」、「紋身終有一日令你後悔」、「做人要自發主動」、「不可與朋友嘅前度約會」等。
另外有啲又邪邪哋：「唔好連續三晚蒲通頂，除非第三晚有好嘢發生啦」。嘩！真係教壞細路！
其他好多都教你點過上流社會生活，例如：「去廁所，要搵高級酒店廁所」、「剪髮要搵某香港酒店嘅某位老師傅」、「畀小費不妨畀多啲」、「買一副貴價嘅太陽眼鏡。你話膚淺？其實女士們都係睇你表面咋」。
講真，絲絲唔能夠全部認同，但又覺得幾搞笑嘅！
余詩韻