絲絲講場：滙控賣產名畫照放

大師作品估值億半

絲絲聽講呢兩幅油畫原本係一個英國銀行家嘅收藏品，輾轉落入滙控手中。今次拍賣品嘅底價係800萬英鎊，不過市場就估計成交價可以高達1,200萬英鎊！

究竟呢兩幅畫有咩咁巴閉？一幅係描繪威尼斯嘅里亞爾托橋（Rialto Bridge），另一幅就係聖馬可廣場（St. Marks Square），呢兩幅畫出自意大利畫家迦納萊托（Canaletto）手筆。

Canaletto嘅畫作以描繪18世紀嘅威尼斯而為人熟悉，佢記錄過威尼斯無數嘅城市景象，好似有耶穌升天日慶典嘅聖馬可廣場、雷擊後聖馬可廣場鐘樓維修嘅情形等，都一一盡收喺佢筆下。

亞洲買家趨之若鶩

絲絲問過喺拍賣行工作嘅朋友，佢哋話最近好多俄羅斯人同亞洲人都好鍾意Canaletto嘅畫作，推高晒呢類作品嘅成交價，照咁睇滙控會執唔少喎！

余詩韻