新iPhone出咗之後，無論你哋點彈都好，仍然大把市場。而蘋果公司嘅品牌價值亦已經升上第一位，踢走長期霸住頭位嘅可口可樂公司啦。
品牌評估機構Interbrand最新嘅年度百大品牌榜出籠，可口可樂蟬聯榜首十三年嘅局面終變，蘋果由第二位跳升一級，揮低可口可樂成為今年全球最具價值嘅品牌，估值983億美元，比上年勁升28%。
呢個百大品牌榜喺○○年推出，各大品牌嘅估值係以企業嘅財務表現、營業前景及消費者調查作為推算指標。第一次跌出榜首位置嘅可口可樂，按年增長2%至792億美元，輕微跌落第三位。
科技公司今年獨領風騷，10大品牌中，就畀5間科技公司霸咗，除Apple外，仲有排第二嘅Google、第五嘅微軟。同Apple鬥得難分難解嘅三星就第八，英特爾則居第九位。
不過，唔係所有科技公司都表現得好好，黑莓同諾基亞嘅排名就好似佢哋嘅手機業務咁每況愈下，宣告賣盤嘅黑莓舊年排名急跌37位至第九十三位，今年更慘成排行榜上「消失的名字」，諾基亞舊年都仲有頭20名，今年已跌到去第五十七位，係100大品牌中跌幅最大嘅品牌。
余詩韻