絲絲講場：王健林穩坐中國首富

彭博稱冠 福布斯再贏

事隔半年，王健林嘅身家已大躍進去到140億元，超越宗慶后。呢個係福布斯嘅最新估算，好快就會有最新嘅排名榜出籠，次序應該唔會點變。

王健林做首富其實有迹可尋，上個月彭博全球億萬富翁排行榜，王健林以142億元身家，力壓宗慶后，成為中國新首富，兩者嘅差別係32億元。

王健林大部分身家都係嚟自大連萬達集團，集團旗下一共有成72個萬達廣場購物中心，同40間五星級酒店，公司淨值有160億元，而佢同家族成員就持有公司64%股份。

王健林其實「百足咁多爪」，除咗購物中心、酒店之外，旗下仲有萬達百貨同埋豪華游艇製造公司Sunseeker，而且萬達集團又喺一二年斥資26億元收購美國嘅電影院經營商AMC，今年又買埋香港上市嘅恒力商業地產(00169)，依家改埋名叫萬達。