唔通滙控（00005）真係特別同叫Stuart嘅人有緣分？話說集團委任咗馬莎前總裁Stuart Rose（羅斯），擔任投資銀行業務嘅零售顧問，咁啱滙控行政總裁歐智華叫做Stuart Gulliver，現任同前任嘅滙豐印度行政總裁就分別係Stuart Milne同Stuart Davis，咁多位Stuart，梗係Stuart Gulliver最高級啦！
講番哩位新加入滙控嘅Stuart先，原來佢同集團嘅關係可以追溯至○四年，喺羅斯剛剛上任馬莎總裁無幾奈，滙控就收購咗馬莎嘅零售金融服務分支，但係當時集團嘅行政總裁仲未係歐智華，兩位Stuart有冇喺滙豐嘅辦公室共撞過，就不得而知了。
雖然唔係資深「賓卡」，但係羅斯來頭唔細o架，佢喺零售界打滾咗三十年。
年前離開馬莎後，佢加盟一家購物網站做高層，消息一出，個購物網站嘅股價即時升逾6%，足以證明佢喺零售界分量十足！