絲絲講場：雅虎新logo體型纖瘦

保留全大楷容易睇

雅虎想換個新logo唔係一兩日嘅事，絲絲留意到啱啱呢個月雅虎個版面，出現不同字型嘅怪誕logo，好似fashion show咁，依家敲定用呢個新logo，驟眼睇都只係字型換咗，字體纖瘦咗。

雅虎咁多年嚟只係轉過隻色，由紅色變紫色，整走過logo底下嘅陰影，今次大膽轉用「無腳」字體（sans-serif），絲絲幾鍾意依家新logo，感覺好fresh吖。

雅虎營銷總監薩維特話，公司正在迅速革新緊，logo都應該煥然一新，但最終保留返個logo嘅原有感覺──詼諧、紫色，同埋個感嘆號。點解揀呢個做新logo？邁耶親自解說：「呢個logo最容易閱讀，皆因佢全大楷，再細嘅芒都睇到嘛！」原來係咁！

其實logo係好代表一間公司嘅印象，所以換親新logo就唔會完全剷走本身元素，例如Google買咗摩托羅拉移動後，個新logo仲留返個M字；微軟Windows個logo，咁多年嚟變極都keep返四個格仔嘅窗口呢！