港交所（00388）呢幾年高層係咁車輪轉，唔單止係公司內部嘅事，就連經紀都擔心會唔會最終影響到佢哋、甚至係投資者。絲絲聽聞，證券業協會就好關注港交所嘅人事變動，早前更致函立法會議員張華峰表達佢哋嘅關注。
證券業協會前主席馮煒能話，就算係普通上市公司高層車輪轉都會關注，何況係港交所，港交所理應係上市公司嘅模範！佢話，港交所近年嘅人事變動，一來太過頻密，二來又涉及咁多高層，證券業協會就擔心港交所高層轉得咁多咁密，會唔會影響佢哋執行政策，最終影響埋經紀行、甚至投資者等。
馮煒能仲話，港交所行政總裁李小加初上場時，「執位」都好正常，但佢上場三年幾，「換人」依然持續，單係財務總監就轉咗三個，該會都希望了解吓港交所喺人事甄選安排上，係咪出現咗咩問題。
講開證券業協會，上個月底剛選新主席，馮煒能今日正式功成身退，東英金融集團創辦合夥人陳立德會接替佢出任主席。馮煒能坦言卸任後一身鬆晒！
余詩韻