絲絲講場:三巨頭逼死希臘米奇老鼠

米奇老鼠面世八十五年來歷盡風浪,依然屹立不倒,就知佢幾受歡迎啦,但英國《每日電訊報》話佢今次遇到勁敵,而且仲係國際貨幣基金組織(IMF)、歐洲央行同歐盟組成嘅「三巨頭」(Troika)喎,到底咩事?

話說係一九六六年創立、至今有成四十七年歷史嘅希臘版《米奇老鼠》雜誌,最近因為當地市道太差被迫摺埋,變相搞到米奇老鼠要由希臘敗走。

雜誌嘅發行人Christos Terzopolous喺facebook解釋,執笠絕對唔係一時衝動嘅決定,但無奈幾個月來都諗唔到辦法、傾唔掂數先焗住摺埋,仲大鬧政府近年來頻頻換屆,貨幣貶值係搞到呢本雜誌雞毛鴨血嘅兇手。

查實衰嘅點止呢本希臘歷史第二悠久嘅雜誌,歐債危機以來,希臘唔少電視台同報館因為生意太差要執笠,閒閒哋搞到四千個記者唔見飯碗,有得撈嘅人工都唔見一大截。

雜誌東山再起唔樂觀

Terzopolous依家惟有寄望「三巨頭」會唔會落實第三輪注資拯救希臘,經濟好轉就有機會東山再起,所以米奇老鼠咪要同「三巨頭」打過囉!不過「三巨頭」嘅要角之一、德國總理默克爾就算連任,對希臘嘅態度睇怕都唔會軟化得去邊,而且聯儲局退市實搞到債息抽升,難怪Terzopolous對前景唔多樂觀。

余詩韻