內地富豪數目多到得人驚，無論身家有幾多個零都好，「軟實力」仲有好大改善空間，所以出咗好多「雞精班」，幫佢地惡補，務求裏裏外外都係個富人。
前排好流行儀態班，就算收費要成10萬元（人民幣‧下同），都有好多靚太爭住去讀。近排拍賣行佳士德、紅酒商Sarment同高級百貨公司都推出「雞精班」，幫內地豪客「速成」藝術、品酒同高級時裝嘅知識！
呢啲「雞精班」絕對唔係「填鴨式」教育。好似佳士德嘅「藝術團」咁，收費20萬，團友會喺14日入面去北京、香港、台北同倫敦，學吓點樣賞析藝術品，由中國陶瓷去到名畫家莫奈作品都會教！
另外，Sarment亦都開辦「紅酒短期培訓班」，收3,000元一堂，對象就係內地嘅專業人士，等佢哋見客應酬時唔會「口啞啞」！
其實中國豪客已經成為全球最主要嘅奢侈品消費者啦，舊年嘅消費額佔咗全球其中27%！絲絲相信，最開心當然係一眾名牌公司啦，事關佢哋賺學費之餘，班豪客以後亦都會繼續消費呀！
余詩韻