工行（01398）同法國保險巨子安盛集團合營搞保險，但係大家理念好兩極化，安盛想好似賣LV咁高檔，工行就想做薄利多銷嘅家樂福，咪盞鬧不和！聽講執掌帥印八年嘅法方高層將會黯然離開。
中外合資真係唔容易，講到尾，兩地有文化差異，話唔埋最後仲不歡而散。去年七月，工行同安盛就偏唔信邪，合營搞保險，即係工銀安盛呢！啱啱先合作咗一年，就已經吵鑊甘。
內地媒體收到風，法方高層馬哲明唔單止唔滿意工行主導開發嘅一個保險產品，喺管理大會上明言「只此一次，下不為例」，仲質疑工行唔識賣保險添！
有業界就咁分析，中法兩方嘅分歧其實好簡單，一個想做LV，sell限量、高端，另一個就想學家樂福大量生產，最緊要平！絲絲喺度諗，其實中方都唔係唔想走高檔，但要切合國情呀！
既然有意見分歧，咁邊個係贏家呢？雖然法方講就講得好大聲，但最後就有人因為呢件事而走，睇嚟LV都只係喺法國賣先啱feel喇！
余詩韻