Market Insight：電視機股力求突破

現時市場估緊八月美國非農職位增加17.7萬，高過七月的16.2萬，萬一到時出嚟數字貼近甚至超過20萬，斷估美債息都要挾上3厘樓上，如果無中長線持貨計劃，在未清楚美國開大開細之前，今明兩日忍吓手好過。

昨日港股終止四連升，恒指跌68點報22,326點，一來美股復市並無跟到亞歐股市周初升幅，其次係連環抽水活動，揭示大孖沙及企業決策人，都趁連日升市後落雨收柴，剔除配股上板因素，昨日大市成交實際上得560億元左右，稍少過前日的569億元，無乜睇頭。三單配股，統一企業（00220）志在沽清○八年中國旺旺（00151）上市時認購的股份，前者中期業績受康師傅（00322）牽頭的方便麵減價戰拖累，業績一般，反之旺旺稍勝預期，股價跑贏年內跌掉18%的統一。

古勝冇點你 2013/09/05

萬里長空

信義管理層眼光準

在商言商，沽貨去改善財政無可厚非，旺旺昨日也守得住配股價收市。信義玻璃（00868）先舊後新配售1.8億股，今年股價累升48%，經昨日一跌，往績市盈率21倍，信義半年業績升近1.1倍，一三年市盈率返回13倍左右。

睇番過去幾次配股集資已追溯到○六至○九年，三次中有兩次接貨者捱一排先返回家鄉，看來管理層掌握時機極為準繩，趁今年升幅唔細攞錢，短期見咗高位的機會相當高。

若非善忘，大家或者有印象，淡馬錫一一年七月及去年五月減持中行（03988）及建行（00939），隨後個市立即腳軟，當日6元接建行揸住的話，大部分時間都要坐艇，值得股民參考。

外資對內銀興趣減

美銀美林把最後20億股建行清倉，近年該行沽清非核心資產外，睇番○五年第一批股份成本價大約每股1.06元左右，就算近兩年建行在5至6元之間浮浮沉沉，粉飾業績誘因仲係好大，尤其近幾個月，全球市場深信美國經濟周期，比中歐等地更早呈復甦，套現番美國應該有更好發揮。

全世界話內銀股估值平絕地球，一三年市盈率僅5至5.5倍，但當日一班上市前已入股的策略股東，個個意興闌珊沽貨離場，剩低滙控（00005）及恒生（00011）依然高唱緊「中國夢」，揸住交通銀行（03328）及興業銀行，今年正好係中國商業銀行股份制改革十周年，外資興趣大減，或多或少道出對銀行業改革進度及成績投下不信任票。

昨日TCL多媒體（01070）藉與百度合作推新產品的消息炒高近一成，收報4.1元，成交1.52億元。顯然，市場一向以工業股看待傳統電視機製造股份，估值唔高得去邊，但如今電視機生產商謀求跨行業發展，拓展三網融合商機，策略為市場受落，亦可為估值加添溢價，小股東當然樂見其成。

同類股創維數碼（00751）昨日亦跟升，升幅3.8%，看來管理層亦要諗諗計變陣。事實上，電視機由CRT發展到LED電視，已由單單追求機身夠「薄」同影音質量，發展至兼具上網及購物等「多功能」，傳統電視機製造商除了要控制成本得宜外，研發方面亦要與時並進，積極開發更多新的電視功能，迎合市場發展需要，始可維持競爭力。

內容供應唔易成功

不過，炒還炒，電視生產商孖內容供應係咪一定得？古勝就甚有保留，強如蘋果公司，教主Steve Jobs及後人都曾經承認，網上電視機頂盒Apple TV乃多年嚟發展最差的一個產品。

喺下載老翻易過食生菜的神州大地，要畀錢睇電視及電影，可能仲難過去搶。在下搵番一○年內地發出網絡電視牌照時，原來TCL早就夥拍過一間叫華數傳媒的內容供應公司，相信無幾多股民記得，就連年報都搵唔到。

古勝