絲絲講場：內銀人工大不如小
好多人以為，打工最好搵大公司，貪佢人工高、福利好，但睇返內地銀行，又唔係咁喎，實情係中小型銀行嘅工資，比大銀行高，絲絲睇咗啲數據之後，覺得自己屬於低薪一族呢。
淨係睇員工薪酬，大行上半年畀員工嘅薪酬竟然跑輸中小行，最錫員工嘅原來係中信銀行（00998），人均工資大約係22.5萬元（人民幣‧下同）。
信行人均工資稱冠
內地《證券日報》做咗個有趣嘅統計，單計16間喺內地上市嘅銀行，上半年員工人均薪酬大約係16.6萬元。中小型銀行最識留住員工個心，中信銀行位列榜首，其次係寧波銀行、平安銀行及招商銀行（03968）。以半年計，呢四間銀行嘅平均薪酬閒閒哋都有20萬元以上，即係每個月都有3萬蚊，望落好過香港好多喎。
四大薪酬敬陪末座
不過，佢哋嘅薪酬計法好唔同，除咗基本工資外，仲包括各種補貼、費用報銷、銷售賞金，同埋年終獎金。
咁大行出手係咪闊綽啲？睇番統計數字，中行（03988）、交行（03328）、農行（01288）、工行（01398）、建行（00939）就排晒喺榜尾，建行員工今年上半年嘅平均薪酬只係得10.97萬元人民幣。
作為打工仔，睇到呢度，當然要衡量下想要高人工，定係牌頭勁喇！絲絲提提大家，以上講嘅都係內地銀行。
余詩韻