Market Insight：水泥股谷底回升

今次微軟僅以54.4億歐元（約560億港元）就買起諾基亞手機生意，十年前諾基亞獨攬手機市場半壁江山，估都估唔到今日落得咁嘅下場。前晚計，市值得1,130億港元左右，比歷史高峰兩萬億跌掉94%，論晒士僅僅大隻過康師傅（00322）些少，證明股神巴菲特講過，永遠唔沾手科技股，源於行業變化快兼高度競爭，諾基亞巨星隕落，已是當代一大鐵證。

科技世界恃強凌弱

睇番第二季全球智能手機系統市佔率，谷歌的Android佔80%，蘋果公司的IOS跌到13.2%，諾基亞夥拍微軟的Windows Phone得3.7%，正面啲講基數細，短期要做出增長唔難，但心嗰句，兩個輸家的結合，輸緊對手幾條街，在贏家得天下的科技世界，確實好難睇好。

古勝冇點你

萬里長空

在上述消息刺激下，手機生產及部件供應設備股禾雀亂飛，TCL通訊（02618）升7.6%，比亞迪電子（00285）升7.2%，富智康（02038）升5.8%，舜宇光學（02382）以及京信通信（02342）均上升4.9%，中國無線（02369）升4.7%，信利國際（00732）上升3.7%，瑞聲科技（02018）亦升2.5%，古勝真係睇唔到到底同諾基亞交易有乜嘢直接關係！

講番港股，美股周一休市，但大戶得勢不饒人繼續挾淡，恒指升219點報22,394點，主板成交569億元，跨周末連升四日，恒指累積升870點，展望本周四及周五，先係美國聯儲局褐皮書，再有就業數據，偷步舞自然吸引大戶酌量減磅，收市後美銀美林把手上最後20億股建行（00939），套現最多116億元，以收市價5.93元折讓2至5.1%配售，相當於5.63至5.81元，比昨收市低0.12至0.3元，約等於恒指32至80點，期指夜市一開跌近百點。

八月中國製造業PMI回升至51，創十六個月新高，分析員陸續向上微調第三、四季中國GDP，滬綜指後知後覺，昨日發力升24點報2,123點，上番六月中以來高位。

揀龍頭海螺最值博

連同昨日兩百多點升幅，技術上港股出現頭肩頂急跌的機會降低，但講到尾，五百多億成交並唔算配合升勢，君可見交投相當集中在重磅指數股身上，反而中小型股份明顯落後。中央保經濟增長，古勝認為水泥股是必然受惠，「李克強經濟學」話要保增長穩就業，方法來來去去幾味，鐵路基建、保障房等加速投資在所難免，另一個水泥消耗途徑係私樓，市場一直估「國五條」可以撐實樓價，令建屋量減慢，事實證明係杞人憂天。

新「國五條」推出後內地樓愈撳愈升，八月全國新建樓房平均每平米1.0442萬人仔，連升十五個月，部分城市更見「日光盤」癲象（開盤一日售罄）。縱觀六成五內房股，半年完成過半銷售目標，因應市況減慢建屋量的可能性，看來已不存在，反而趁好價趕工賣多啲機會更大。

再睇華南地區水泥價格六月見底後，即使未見大升，但持續個個星期升十多廿元人仔，估計區內能夠受惠的包括安徽海螺水泥（00914）、華潤水泥（01313）及台泥（01136），唔想煩，最好揀龍頭股海螺，一三年市盈率13.2倍，比五年平均14.8倍折讓10.8%，行業啱啱先谷底反彈，仲未計預測上調的可能，不妨留意。

紙業股料短暫受惠

近日工信部公布今年第二批工業行業產能企業名單，當中淘汰咗67家低端造紙企業，消息刺激玖龍紙業（02689）及理文造紙（02314）做好，收市分別升13%及7%。行業汰弱留強，對於兩隻龍頭紙企當然係好消息，但股價要擺脫弱勢，除了行業整頓改革之外，更重要的是經濟復甦，帶動產品需求上升，這樣大型企業才能發揮產銷上的規模效益，在這項因素確認出現前，類似今次關閉同業低端產能的消息刺激作用相信只屬短暫。

古勝