「金磚四國」同「歐豬五國」家傳戶曉，呢啲國家曾經令投資者賺到笑，亦曾經輸到嗌救命。依家環球形勢轉晒，投行為咗令大家易明啲，又「度咗」幾個新詞出嚟，睇見都想喊。
德銀同美銀不知幾驚全球經濟又再出事，分別創造咗「脆弱五國」（BIITS）同「冧市五寶」（CRASH）兩個新詞出嚟，睇呢啲新詞，就估到佢哋對後市幾咁悲觀。
「脆弱五國」指巴西、印尼、印度、土耳其，同南非，呢五國有三個係金磚國，真係風水輪流轉。「脆弱之父」德銀分析員拉斯金就話，九七年泰國本地生產總值只不過佔全球0.5%，都搞到亞洲金融風暴，今時今日呢五國GDP加埋佔全球7%，一旦投資者失去冷靜，繼續撤資，肯定牽連甚廣。
至於「冧市五寶」就係衝突（Conflict）、利率（Rates）、亞洲（Asia）、投機（Speculation）同埋樓市（Housing），始創人美銀分析員哈特尼特指，衝突會觸發市場恐慌，推高油價，而美債孳息抽升，令資金由「脆弱五國」回流美國，加上美國做短炒嘅孖展金喺四月再創新高，一旦有投機事件觸發跌市就好危險，而且美國樓市復甦近排又有啲乏力，為聯儲局政策，乃至環球市況帶來好大不穩定性。
其實佢係針對印度、印尼同土耳其，絲絲覺得個「A」有啲「夾硬嚟」，話晒MSCI指數顯示，拉美市場回報五月起跌20.2%，而亞洲整體只係唔見11%，希望唔係因為要砌到CRASH呢個組合，夾硬加個A。
余詩韻