絲絲講場：中銀人壽新角度幫子女圓夢

中銀人壽嘅廣告出晒名夠warm，頭兩輯都係sell溫情，因為愛，作為父母，要幫子女做好計劃，同埋幫自己做好退休打算，咁就唔駛加重子女負擔。

上兩次都以父母角度出發，今次推出嘅第三輯廣告，中銀人壽執行總裁蔡中虎就話要換個角度，由子女出發，作為父母唔係幫小朋友籌謀夢想，而應該幫小朋友尋找佢哋嘅夢想。

故事講小朋友好有畫畫天份，唔鐘意做乜師物師，爸爸好sweet，冇迫小朋友做佢唔想做嘅嘢，反而為佢做好理財，等囝囝可以去巴黎學畫畫。最後，當然係大團圓結局啦。

七位數廣告算慳家

出埋畫冊嘅囝囝最後喺巴黎火車站撞到爸爸，嘩，嗰個鏡頭真係好感人，絲絲都忍唔住流下眼淚。

雖然係一個好簡單嘅故事，但製作好認真架！蔡中虎話，又請台星，又請成隊攝製隊去法國，印本畫冊又要錢，又要喺電視播，埋單都只係七位數，真係好慳家喎！

不過絲絲心水清，條片成2分鐘咁長，電視播應該唔慳得喎！蔡中虎話畀絲絲聽，電視播嗰個係濃縮版，如果大家想睇足本版，可以去分行欣賞！