聯想（00992）成功登上PC行業龍頭之餘，佢哋包括智能手機同平板電腦嘅多媒體、互聯網數字家庭（MIDH）事業群亦急起直追，主席兼行政總裁楊元慶當然唔會忽略伙記嘅努力。聯想內部已經「通晒天」，楊元慶又自掏腰包，攞325萬美元（約二千萬人民幣）出嚟，分畀基層員工，估計有近萬名員工，可以分到2,000蚊人民幣嘅特別花紅。
今次係楊元慶第二次自掏荷包獎勵員工，聯想內部更將稱之為「元慶特別獎」。雖然以人均嘅2,000人仔花紅，同去年無乜增加，不過以涉及嘅325萬美元獎金總額，比起舊年多出8.3%，即係話受惠人數多咗。楊元慶舊年嘅1,460.6萬美元薪酬中，酌情花紅約422.7萬美元，佢今次就將自己近76.8%花紅撥作鼓勵員工，多過舊年嘅60%。
今次分享獎金嘅員工，遍及聯想全球20個業務國家或地區，呢個好消息，由聯想人力資源部資深副總裁喬健向員工發出，內部通告形容，楊元慶再次以私己錢獎勵員工，係因為認為作為老闆，有責任確保公司上下明白員工對聯想建樹咁話。
講開自掏荷包獎勵員工，當然就唔係楊元慶獨有，俄鋁（00486）行政總裁歐柏嘉，據報在舊年亦曾經撥出自己所獲嘅300萬美元花紅，予俄鋁其中120名員工，數數手指有關員工嘅人均可分得2.5萬美元，都咪話唔大手筆！