期指觀瀾：大市轉勢言之過早
筆者確實低估市場對中國八月份製造業PMI指數的反應，昨日大市開21,948點，好快升穿22,117點的阻力，十點前已見全日高位22,240點，之後全日大市橫行，悶到收市，最後升443點報22,175點，主板成交552億元。
即月期指收報22,156點，上升588點，表面低水19點，但撇開除淨因素，較合理值22,077點高水79點，自八月中的調整以來屬罕見。
昨晚美股無市，期指好友選擇周一挾淡倉，仲要大高水收市，莫非好友有把握在今早再下一城？觀乎昨日港股幾乎係一枝獨秀，升幅2%，升幅幾乎是全亞洲股市之冠，不過，基本上指數升勢居然於開市首半小時完成，更重要係整個大市上升及下跌股份比例，只係54對46，稍為高過五成，絕非一面倒雞犬皆升局面，反映大戶只是托住幾隻重磅指數股，殺淡友一個措手不及。
百般不願，但不得不按計劃，在指數高於22,117點收市先把手上淡倉止蝕。基於上述理由，對大市轉勢筆者仲係有所保留，要破壞八月營造的頭肩頂形態，大市至少要升穿八月二日的左肩高位22,291點，方可確認今次係真破位而非後抽，現時指數只有百餘點之距離，應該好快會有答案。
John Mullen