Market Insight：光伏股 不宜高追

昨日期指罕有地高水收市（計埋除息近98點後），大戶真係殺淡友殺得性起。睇番昨日亞洲其他股市，港股無疑最威，日股都係升1.37%，A股又唔多郁，港股開市十五分鐘恒指全日高低位搞掂，始終咁奀成交，大孖沙真係想開邊瓣就開邊瓣。然而，論到港股是否轉勢，似乎仲要睇多兩日至穩陣。

地產股有機追落後

昨地產股表現標青，恒地（00012）升3.4%，新世界發展（00017）升3.1%，後者上周六開售元朗新盤溱柏推238伙，兩日賣掉八成四，平均呎價8,345元，元朗去到呢個價其實唔平，消息話studio及一房最好賣，似乎雙倍印花稅辣招，對中產父母幫仔女置業的上車盤衝擊較細，地產商不妨諗諗將大呎數樓拆細變上車盤賣。

古勝有點你

萬里長空

今年地產股股價仲輸緊恒指幾條街，如果新盤唔係想像中咁滯銷，真係值得諗下，上面兩隻地產股多農地兼折讓大，加埋推盤量夠大的新鴻基地產（00016）及長實（00001）夠晒。

國家發改委公布首批光伏行業示範補貼，全國範圍內分散式光伏上網電價補貼標準，訂為0.42元（人民幣‧下同）/千瓦時，訂出的標準較早前徵求意見文件中提及0.35元/千瓦時補貼額，多出近兩成，以現時內地火電成本每度電大約0.4至0.5元，光伏發電大約0.9至1元，經過補貼，光伏行業總算有番一定市場競爭優勢，算係月初歐盟暫時唔向中國輸歐的光伏產品徵收47.8%反補貼稅（協議有效至一五年）後另一好消息。事實上，歐盟消耗內地五成以上光伏產品，一旦徵收反補貼稅，市場估超過三成內地光伏企業，因為過度投資要立即關門大吉。

利好消息大致反映

常言道，股市比實際經濟或者企業營運走先兩至三季時間，股市看來也預計中歐貿易戰最終「大步檻過」。今年光伏股大都跑贏大市，即使早前業績後急跌，年初至今卡姆丹克（00712）股價仍累積有54%升幅，保利協鑫（03800）累升32.6%，興業太陽能（00750）升21%，唯獨去年勁蝕，上半年「蝕少咗」的陽光能源（00757）要跌26.4%。

上星期龍頭保利協鑫半年成績表，蝕9.17億元（港元‧下同）或者每股5.93仙，核心業務毛利率見底回升，由6.1%回升至6.6%。上半年生產太陽能電池的主要原件多晶硅，產量達8,472公噸，較去年下半年升1.37倍，大行估計行業會緩慢復甦進入階段，要止蝕，一定要圓晶加工成本進一步控制得宜，保利協鑫明年才有機會虧轉盈，但講緊是4億至5億元左右，預期市盈率近70倍，現時股價會唔會行得太前，見仁見智，但利好消息出得八八九九，如果想搵快錢，似乎短期值博率又唔係太高。

炒作應盡量即日鮮

除了光伏股之外，其他新能源股昨日亦有異動，但普遍在高位缺乏承接，華能新能源（00958）曾高見2.72元，惟最後回落至2.56元收市，僅升2.4%；龍源電力（00916）全日高位做8.44元，收報8.36元，升2%；大唐新能源（01798）以及華電福新（00816）亦同樣低收作結。

看來，明知升市純由大戶挾淡倉帶動，股民對於高追異動股抱審慎態度，即市高位遇阻之下，獲利回吐壓力不輕，故呢期短炒宜避免高追，且盡量走即日鮮，好好醜醜即日埋單去計數，以盡量降低持倉風險。

古勝