Market Insight：內房可炒收窄折讓

今個月，三隻貨幣兌美元都貶值約一成，除搵港銀換披索的「菲律賓姐姐」，因為咁變相換多咗銀紙高興之外，三個股市嘅股民，真係苦過「弟弟」。昨日單日插低3.96%、3.7%及3.38%（去到傍晚五點），亞洲股市吹起陣陣秋風，日韓台三個股市都統統見紅，港股下跌130點報收21,874點，主板成交輕微多過前日，有479億元，沽空佔大市成交比例，由前日的9.84%反彈上11.41%。

大孖沙傾向口淡淡

九月期指收報21,767點，低水107點，即使計埋除息因素都低水54點，拋現貨、沽空兼大低水轉倉，簡單講，口淡淡的大孖沙佔市場上多數。

古勝冇點你 2013/08/28

萬里長空

展望由今日去到下個月十七、十八日聯儲局議息，可以影響到華爾街對美國退市睇法嘅events實在唔多，數埋最有威力，係下周的聯儲局褐皮書，以及八月非農業就業職位增長及失業率，缸邊客屆時記得要留意。

恒指昨日跌幅唔大，不過藍籌股跌得頗為全面，50隻之中37隻見紅，市場預期息口將有升無跌，加埋特區政府雙辣招將準買家嚇窒，地產商開始提供較大的折扣作招徠。長實（00001）、恒地（00012）、新地（00016）、新世界發展（00017）以及信和置業（00083）嘅跌幅介乎在0.3至1.8%。

美銀美林報告話，依家地產商股價較資產淨值折讓，平均達44%，已經預先反映一四年底前樓價可能跌25%的不利因素，分析員Raymond Ngai的三隻心水股依次係長實、新世界及新地。

新奧入貨再等一會

港股業績期進入尾聲，新奧能源（02688）半年賺7.37億元人民幣，按年升1%，剔除債券市值變動及匯兌等非經營因素，核心業務收益有19.8%增長，較大行估計多12.5%，不過，淡友一樣無面畀，股價被隊低5.4%報38.45元。說到底基金當港股係提款機，繼續由outperfomer身上攞錢走，業績好插少啲，業績唔對辦直頭一股唔留。

睇番上半年燃氣銷售增長22.8%，稍低過管理層全年目標25%，昨日朝早分析員會議，據聞管理層拍心口話下半年可以追番目標。新奧上半年落實九個新項目，已經提前達到年初預期，一三年市盈率17倍，古勝睇好燃氣股，亦相信會係少數未來幾年肯定交到增長的中資股之一，但新奧與同業比較唔算最平，昨日又穿過250日線37.9元，守唔住或者會返回年初起步位34至35元水平，想入貨者不妨等一等。

恒大地產（03333）半年核心盈利升22%至46.6億元人民幣，好過預期，昨升3%收報3.4元。舊年開始公司調整投資組合，增加一二線城市投資去到四成二，食正「國五條」撳都撳唔住個樓市，加埋本身三線城市準備推出項目多數位置唔錯，分析員估明年開始，毛利率會明顯改善，上半年為27.2%，若上番三字頭，一三年市盈率5.1倍。

恒大財政狀況改善

恒大向來係惹火尤物，亦唔止一次被淡友狙擊，半年手頭現金大增67%去到420億元人民幣，淨負債比率由84%降至58%（計埋上半年發的永續債券則為76%），財政條件明顯好咗唔少。

正面睇，有條件入貨買多啲地皮，亦意味着，一旦回購亦唔會係得個講字。或者真係投鼠忌器，六月銷售數據出咗，賓架心裏有數之後，七月初恒大沽空已經明顯收斂，昨日股價勁升都係得5球沽空，佔咗成交5.9%左右，少咗一批攔路虎，加埋又向來較中國海外（00688）及華潤置地（01109）等基金重倉股，資產折讓較大，睇情況短期的確有條件收窄。

古勝