內險股受投資者歡迎，其中一個原因係發展空間仲係好大，絲絲見到淘寶出咗隻新保險產品，就深信呢行真係前途無限。
阿里小微金融服務集團旗下淘寶保險，推出嘅「賞月險」，係應節產品。顧名思義，只要投保「賞月險」，中秋節當晚唔可以成功賞月嘅話，就可以獲得最多188元人仔賠償。
絲絲就查過，原來「賞月險」分兩種，第一種投保額係20蚊人仔，淨係包上海、廣州同深圳三個地區，賠償只得50蚊人仔；另一種投保額就係99蚊人仔，囊括全國41個城市，賠償有188蚊人仔，投保仲送一盒冰皮月餅添。
淘寶保險話，賠償嘅依據係當地嘅天氣狀況，淘寶會根據中國天氣網嘅資料，如果當晚八點至凌晨兩點嘅天氣顯示為陰天或雨天，投保人就可以得到賠償，金額會自動轉到投保人嘅支付寶戶口。
淘寶保險推出3年，平台上完成嘅交易宗數超過10億。目前，淘寶保險平台上嘅日均投保量已超過200萬宗。除咗「賞月險」，絲絲發現有一個「單身保」畀客戶投保，而且已經有十個人投保，咁多古靈精怪嘅保險品種，你話係咪大有前途呢？
余詩韻