絲絲講場：凱基擴業務自設公關
近年大市成交低迷、租金成本上漲，證券業已愈嚟愈難撈，絲絲不時聽到證券行倒閉嘅消息，真替業界朋友捏把冷額汗，但凱基證券營運總裁鄺民彬（Ben哥）見慣大風浪，反把業務愈搞愈大，近日已成立公關部門，好讓股民了解凱基在港台兩岸的發展。原來新到埗的公關主任，跟Ben哥一樣都係信佛，莫非呢個係凱基嘅請人條件？
鄺民彬同伙記有「偈」傾
眾所周知，Ben哥係虔誠佛教徒，間中仲會同絲絲講吓佛偈，碰巧公關主任陳靄婷（Olivier Chan）同屬佛門中人，十分有緣，兩人更提到禪修，當做到心無旁騖，便能理清思緒。故Ben哥每天早上及lunch空檔均會坐禪約一小時，可有助思考及分析市場走勢咁話。絲絲心諗，莫非凱基係金融界寺院，專收佛教徒？Ben哥話，咁啱大家都係佛門中人，唔係入職條件，大家唔好誤會。
Ben哥仲話，旗下分析員做事認真又專業，打逆境波都冇有怕，如今猶如搵到接班人，將來可放心退休。其實Ben哥魄力十足，何須咁早講退休呀？