歐豬五國搞到成個歐洲嘅經濟都陷入危機，經濟到依家都仲未復甦。絲絲收到風，近排就連法國東方匯理銀行嘅一班ibanker都畀總公司法國農業信貸銀行大大咁削減工作津貼呀！
絲絲聽講喺幾個星期之前，班ibanker忽然收到公司一封名為「Time to go on a diet」嘅縮皮通知，話以後無論出去公幹定係見客，公司畀嘅津貼都會減低，搞到佢哋個個叫苦連天呀！
根據公司嘅新規定，日頭嗰陣佢哋唔可以再喺巴黎、倫敦、紐約呢啲出名生活指數高嘅大城市搭的士；就算係去歐洲公幹，每晚酒店住宿費只有165蚊歐元；如果唔係見客應酬，每餐嘅膳食費就唔可以超過25蚊歐元！仲有就係嚴禁搭飛機公幹。
收到呢個消息之後，班ibanker個個都喊晒口呀！事關歐洲嘅酒店出晒名貴，得165蚊一晚就連荷蘭阿姆斯特丹市中心嘅萬豪酒店都住唔到，以後出Trip就只可以住喺周邊地區嘅酒店呀！
其實早喺○八年金融海嘯嗰時，花旗銀行已經限制一眾ibanker召開跨國會議，減少佢哋公幹嘅次數，就連公司彩色影印嘅費用都要減少呀！絲絲覺得，員工同公司一齊共度時艱好正常，相信當經濟危機一過，公司好快就會恢復佢哋嘅福利o架啦！
余詩韻