絲絲講場：恒生灣仔分行愈做愈大
恒生（00011）旗下嘅灣仔莊士敦道分行啱啱完成翻新，尋日正式開幕營業。行政總裁李慧敏（Rose）亦有出席撐場，仲話會繼續擴充呢間分行，莫非睇中灣仔係百萬富翁最密集嘅地區？
Rose話到咗一五年，呢間分行嘅總面積會由現時嘅8,000平方呎倍增至16,000平方呎，成為僅次中環總行、喺港島區最大嘅分行。
除咗翻新分行網絡，Rose話恒生今年已經增聘咗超過100個前線銷售人員，令團隊擴充至超過800人，而目標就係1,000人。
五分行延長周六服務
由八月三日開始，恒生仲會延長五間分行喺星期六嘅營業時間至下午四點，包括位於新港城中心、新都會廣場、屯門市廣場、青衣城嘅分行，同埋君薈坊嘅優越及優進理財中心。不過，喺延長服務時段內，分行主要提供開戶、基金及人壽保險服務，係不設櫃位或者現金服務嘅，大家要留意喇。
余詩韻