家庭衞生日用品除咗講求實用性同質素，外形都要睇得先吸引到消費者，尤其是印有適合一家大細嘅卡通人物產品，特別受人歡迎。所以生活用紙品牌生產商維達（03331）相當醒目，成日搵具知名度嘅卡通人物合作，發揮卡通營銷策略，最近仲攞到風靡全球嘅「海綿寶寶」嘅形象授權。
維達行政總裁張東方就話，今次係睇中「海綿寶寶」畀人開心快樂嘅感覺，同維達有親和力嘅形象不謀而合。而維達附有「海綿寶寶」卡通嘅捲紙同面巾等一系列新產品，將會喺中、港及澳門推出，授權直至一五年七月底止。
其實過去幾年，維達已先後取得內地卡通品牌「喜羊羊與灰太狼」版權、聯同美國荷里活「夢工場」推出「功夫熊貓」系列產品等，結果深受具高消費力嘅成年人同熱愛動畫嘅年輕人支持，唔怪得維達對卡通營銷策略咁有信心，透過國際化嘅卡通寵兒地位提升知名度，兼刺激集團銷售呢。
余詩韻