股神巴菲特最近又慷慨解囊，捐咗近1,750萬股巴郡B股畀微軟創辦人蓋茨創辦嘅蓋茨‧梅林達基金會，股值接近20億美元（約156億港元）。絲絲聽聞過去八年嚟，股神已經捐咗超過1.69億股股份畀蓋茨嘅基金會，而今次更加係歷年捐贈規模最大嘅一次！
自○六年起，巴菲特每年七月都會送大禮，捐贈少於5%嘅股權畀蓋茨‧梅林達基金會。
當然佢唔會大細超，同時都會派巴郡股份畀幾個友好基金會，包括用已故妻子命名嘅基金會Susan Thompson Buffett Foundation同兒子嘅基金會Howard G.Buffett Foundation，今年都喺捐贈名單之內。
不過，同一時間，蓋茨自己名下嘅獨資公司、全球第二大圖像服務公司Corbis，最近就傳出經營不善同欠薪嘅負面新聞。有傳Corbis舊年同內地企業合資開嘅圖庫網站「Veer中國圖庫」，今年五月出糧嗰陣，有員工表示公司戶口無資金，一度拖欠員工兩個月薪水，又話網站營業額未達標賺唔到錢。絲絲聽講兩間公司當初承諾各出500萬元合資，但Corbis畀咗三百幾萬元就無咗影，好似話考慮緊係咪換過另一間合資公司，睇嚟蓋茨自己要睇番實自己啲公司至得囉！
余詩韻