絲絲講場：21歲仔創業吸金2億
美國史丹福大學畢業生，今年啱啱畢業就已經成立自己嘅公司，仲籌募到2,500萬美元（約1.95億港元）種子基金，打破紀錄成為硅谷歷史上最大規模嘅種子基金！呢頭畢業，呢頭就有得發揮，恨死唔少依家仲周圍搵工嘅應屆畢業生啊。
21歲嘅Lucas Duplan同佢嘅公司Clinkle成立無耐，已經獲得不少著名嘅基金或公司注資，當中包括創業投資基金Andreessen Horowitz、電腦公司Intel等等。不過有咁多投資者，有人就擔心Duplan冇咗自主權，Duplan就解釋話其實每個投資者嘅注資都唔算多，而且有咁多專業人士畀意見，佢仲有着數！
流動付款app多人吼
Duplan年紀輕輕已經有咁多人欣賞，絲絲都好有興趣知道到底佢間公司係做咩。原來早於兩年前，Duplan已經同佢嘅團隊開發緊一個流動付款app，但呢個app嘅原型都未開發好，依家仍然做緊測試，仲要到年尾先可以推出市場。
話雖如此，呢個app已獲得多項專利，而且聽講班投資者只望過一眼，就主動話要出錢支持。