絲絲講場：常茂兩次上市撞啱同日
世事有時就係「咁啱得咁蹺」，○二年六月廿八日，常茂生物（00954）喺創業板上市，經過十一年後，尋日常茂生物再次舉行上市儀式，不過今次就轉戰主板。能夠兩次掛牌都喺同月同日進行，都係一個唔細嘅創舉，董事長芮新生直言，要好多方面配合先得，感覺非常幸運！
轉掛主板似湊大個仔
睇住公司由創業板轉掛主板，就好似望見小朋友長大成人咁，最開心嗰位一定係將公司由細湊大嘅芮總啦。
佢話○二年上市時常茂仲係一間寂寂無聞，規模好細嘅公司，經過十一周年，公司產品線擴大咗唔少，規模亦都倍增，所以好高興可以喺主板上市提升流通量。芮總仲滿腹大計，下一步就係考慮收購內地小型同行企業，透過重組令公司更加有增長潛力。
芮總係江蘇省常州人，熱愛家鄉嘅佢，尋日仲充當埋文化交流大使，將一幅當地特產「亂針線」送畀港交所（00388），原來呢種類似刺繡嘅裝飾品係當地特產，芮總為表誠意，更搵嚟當地大師以人手製作。至於「亂針線」繡上嘅一朵大花，就係寓意帶嚟富貴同陽光。
余詩韻