最近投資相連壽險（投連險）佣金披露成為城中熱話，聽講曾經有代表保險公司嘅組織要求代理，毫無保留地向客戶披露佣金，激到班代理「紮紮跳」，差啲就拉大隊遊行以示不滿。不過，最後大家都肯讓步，暫時叫做傾掂數啦！
保險代理一向都好聽保險公司話，唔會咁高調出嚟爭取啲乜。今次喺投連險披露佣金呢件事上面，代理們一反常態地聯成一線，齊齊發聲，話晒披露佣金就好似要求一個女人將年齡話畀全世界知一樣。
通常開到一張壽險單，代理會喺頭幾年收晒啲佣金，第一年舊錢就最大份，之後就按年遞減，多數收足五年。金占士收到風，有代表保險公司嘅組織曾經要求代理，如果有客問起，不如講個制度畀佢哋聽！
呢個建議傳到去班代理嘅耳中，佢哋梗係慶啦，有人發起遊行，聽講仲有成千人聲援o架！不過，好多資深業界就覺得唔work，幫手斡旋，終於大家都讓步，嚟緊只需要用一個較溫和嘅方式，提醒客戶有權知道中介人嘅佣金，至於點演繹？只要唔存在欺騙就得喎！
至於遊行就暫時擱置咗，算係傾掂數。諗番轉頭，如果唔係班代理咁團結，啲組織、保監處代表又點會肯同前線人員加強溝通？
金占士