絲絲講場：新地陳國威 分享喜閱
俗語話「開卷有益」，好多上市公司老細或者管理層，有恒常嘅閱讀習慣，仲會推介畀周圍嘅朋友。新鴻基地產（00016）執行董事兼首席財務總監陳國威（Patrick）平日都睇好多書，加上身為上市公司管理層之一，睇嘅書唔多唔少同日常工作拉上關係，好似《Leadership》同埋《領導就是喚醒生命》都係佢嘅推介。
消閒著作中領悟哲理
Patrick話後生時掛住工作，睇嘅書都係圍繞工作，近年就睇多啲外國嘅消閒書，佢重推介美國作家米奇‧艾爾邦嘅長篇小說《Tuesdays with Morrie》。故事根據真人真事改編而成，講主角重遇大學恩師，發現佢身患絕症，喺恩師教授最後嘅十四堂課入面，令到性格好功利嘅主角改變咗好多，亦體會咗好多道理。
勉勵年輕人「走得更遠」
新地連續四年舉行年輕作家創作比賽，資助咗33位具潛質同有志做作家嘅年輕人出版首部著作，今屆更首次將活動伸延至內地。尋日佢哋搞咗個頒獎禮，Patrick希望參加者透過作品發放青春正能量，鼓勵得獎嘅年輕人，呢個獎只喺佢哋創作路上嘅開始，希望佢哋可以繼續發揮創意，寫更多作品，未來喺創作路上可以走得更高走遠。