自從新世界創辦人鄭裕彤（彤叔）去年初退下火線後，成個家族嘅分工比以前更加清晰。
旗艦新世界發展（00017）尋日就公布，彤叔女婿杜惠愷將會喺七月起辭去新中（00917）同新創建（00659）副主席兼非執董嘅職務，轉為擔任新世界嘅副主席兼非執董，協助家族嘅第三代接班人鄭志剛（Adrian）打天下。
彤叔退休只係年幾，新世界除咗交到靚成績之外，業務上積極轉型，人事變動都相當頻繁。尋日新中同新創建就公布，因為杜惠愷要投放更多時間喺其他事務，所以辭去兩家公司嘅董事職務。
其實杜惠愷喺系內一直扮演「太傅」角色，相信今次杜惠愷系內轉型地產業務，同扶助家族第三代成員上位有關。另外，新世界仲委任咗歐德昌為執行董事，都係喺七月起生效。
絲絲睇番資料，68歲嘅杜惠愷仲有「鑽石大王」嘅稱號，父親杜若波同彤叔係多年世交，七九年兩家結為姻親，同年杜惠愷加入新世界集團。此外，杜惠愷亦身兼包括香港太平紳士及全國政協等公職，仲喺○八年得到法國政府頒授嘅法國最高榮譽騎士勳章。
余詩韻