零售前景不被睇好
紅旗轎車嘅生產商係第一汽車集團，佢哋透露，喺投入咗3億美元重整旗鼓之後，紅旗轎車將會喺今日啟動零售銷售，即係話，大家如果有機會返內地揸車，可以考慮整番架紅旗，沾一沾呢部咁有歷史背景嘅轎車。
不過，有分析員就大潑冷水，唔多睇好紅旗轎車嘅零售前景。佢仲打咗個好有趣嘅比喻，話紅旗呢個汽車品牌就好似喺人工環境長大嘅熊貓一樣，除非血液入面有兇悍嘅DNA，否則都好難喺中國汽車市場呢個森林入面生存到。
呢款紅旗轎車以前好巴閉，一汽集團喺一九五八年生產咗第一部，不過因耗油量大、成本高，有乜平民百姓會用？