Market Insight：手機股勿寄厚望

自從滙豐中國五月製造業PMI跌穿50，第一季中國GDP意外地滑落到7.7%後，睇番彭博，大行紛紛把今年中國GDP打折，中位數落到7.8%，意味着四拾五入後，同IMF差距唔大。昨日跌市元兇，斷估唔係IMF副總裁David Lipton幾句說話咁簡單。

高息股吸引力降

值得留意，隔晚道指有近百點進帳，但高位計回番近百三點，市後解釋話獲利回吐，但古勝認為，自從聯儲局主席伯南克上星期國會答問時提出，未來幾次例會將開始研究減少買債的安排，這退市預期正全速在債市醞釀。近期美國十年債券孳息見異動，隔晚抽穿三月高位2.08厘，去到2.135厘的超過一年高位，而息升預期也直接衝擊收息股，昨日領匯（00823）跌近4.2%，兩個星期時間，高位計跌超過一成。收息股或者一些負債比重高的股份，都係避一避好。

古勝冇點你

萬里長空

基金繼續換貨，從Out performer計數換入Lagger，上星期先寫過話特步國際（01368）第四季度接單比舊年仲跌緊15至17%，跌幅細過第三季的20%，惟整個體育用品板塊，由一○年開始沉淪近三年，簡單講係由極衰變成普通衰，已經畀賭性較重的基金經理足夠理由去短炒一轉。昨日逆升做好有李寧（02331），股價升6.5%，安踏（02020）升1.7%，特步升1.3%。古勝唔會阻止看官們追勢，不過記緊要識得落車，行業雖然處於谷底，但長遠彈唔彈得番上去係另一回事。

四月份，中國新增3G用戶1,280萬，按年升77%，按月卻跌26.5%，三巨頭的淨客戶增長數字，中移（00941）565萬按月跌42.8%，聯通（00762）408萬跌5.9%，中電信（00728）307萬跌4.9%。雖則話四月3G上客數字差成咁，但幾隻炒中國4G概念的相關股份，卻是絲毫無損，講到底分析員認為季節性因素之外，三巨頭在手機補貼上無出盡全力谷客有關也。

今年初在下經已叫睇實4G概念股，出乎意料，內地相關機構實牙實齒話今年開展4G發牌、建設及基站測試，偏偏設備股唔得，手機股炒到癲。年初至今兩隻主打手機生產商TCL通訊（02618）及中國無線（02369）累積升77%及63%（主要升幅在四月中之後），設備生產股如京信通信（02342）及中興（00763），無進帳不特止仲要跌，表現雲泥之別。除了兩隻手機股向來多基金參與，分析員慣性推介之外，真係諗唔到其他原因。

押錯電訊設備股

老實講，現今智能手機市場，軟件由谷歌Android及蘋果公司IOS兩分天下，微軟、諾基亞仍不成氣候，硬件由本身兼具顯示屏及晶片研發能力的韓國三星所壟斷，整個供應鏈重要技術及增值部分，由幾間公司控制，就算強如聯想集團（00992）抑或上述兩間手機商，說穿都只係做「下欄嘢」，零部件裝嵌生產。綜合街外大行估TCL通訊一四年市盈率17.7倍，月初摩通報告估佢一四年賺6.03億元，咁計得8倍PE，券商睇法落差都好大，今年揀啱題目選錯股，依家追又驚唔追又恨，平心而論去到現水平，只適合細細注。

收租股轉弱有因

昨日尾市恒指跌幅擴大，主要受本地地產股拖累，其中九倉（00004）股價大跌逾半成，有指觸發點是里昂報告話九倉有集資可能，但其實份報告上周已發表，加上昨日地產股跌勢頗全面，相信另有其因。其中一個可能性，乃受打擊樓市炒風影響，上半年地產股的新盤銷售表現幾可肯定遠遜預期，加上下半年銷售前景尚未明朗，故促使部分基金在半年結前調整組合，減持地產股。

另外，五月黃金周部分零售消費有所下跌，以及近日瑞士錶減稅等消息，皆不利收租股估值。且看各大孖沙會否加大增持規模，抗衡股價跌勢！

古勝