Market Insight:能源巨企 唔啱潮流

近期港股愈升愈有,開始追番二、三月歐美日股市的升勢,恒指上周五以貼近兩個半月嘅高位收市,升109點,報收23,321點,周線圖上,呈連升四星期。

港股基本面其實無乜大變化,今時唔同往日的,主要係股市參與者感受到外圍投資環境變化,尤其近兩三個星期,全球多國央行紛紛透過貨幣政策刺激經濟,歐洲、印度、澳洲、南韓、斯里蘭卡及越南,均在上周加入減息行列,這股超低息旋風,源自日本首相安倍晉三的超寬鬆貨幣政策,大幅推低圓匯,逐見到成效。

上周,日圓兌美元跌穿百算,創近四年半新低,出口及科技股帶動東京股市急升,日本的商業景氣復甦力度開始轉強。今次「安倍經濟學」抱住不成功便成仁的決心,到底最後能否解決日本經濟低迷廿載的困局,只能夠等歷史話畀我哋知,但當前的即時效果,係畀到其他國家一個示範,新一輪鬥快鬥狠放水推低匯價的貨幣戰爭,有趨勢蔓延到全世界,由各國央行的動作,可以見到大家對通脹復燃的憂慮,遠遠及不上通縮重臨。

內地遲早跟隨減息

另一方面,中國以擔心物價回升為名,實際配合樓市的調控措施為實,選擇逆線行車,為過去幾年鬆寬貨幣政策打修正球。上星期內地公布四月份CPI輕微回升至2.4%,超過預期,大部分人共識是短期減息可能性減低。不過,環球減息大氣候使然,加埋近期人民幣異常強勢,恐怕對復甦中的出口業會是百上加斤,估計中國遲早都會追隨大勢,重啟減息步伐。

今年,恒指由年初高位23,944點,跌至四月中21,423點見底,合共跌2,521點,而跌幅的0.764反彈阻力,剛好是23,349點。上星期,大市反彈高位是周四的23,353點,一度升穿這重要阻力位,如果能夠企穩收市,意味後市再試23,944點,甚至挑戰更高水平的機會大增。以中資股普遍處於歷史中下檔次的估值,估計今年股市高位,較大機會在第三、四季出現。

近期股市熱話,是華潤系兩間能源公司重組,咁啱古勝上個月底,先來個套餐推介華潤電力(00836)以及華能國電(00902),點知合併消息一出,潤電股價唔單止打回原形,上周五更錄得一成嘅跌幅。潤電吞下華潤燃氣(01193),將以每100股新潤電股份換取97股潤燃股份,完成重組後,潤燃會撤銷上市地位。

通常公司合併,原因來來去去離唔開節省營運成本,例如縮減重疊業務,合併後降低融資利率等等,弔詭是潤電和潤燃的結合,出價唔平(等於將一三年11倍PE嘅潤電撈埋約20倍嘅潤燃一齊上市!),對潤電股東即時好處十分有限之外,兩者業務唔單止無太多重疊,至於可以慳錢嘅地方,古勝特登搵番兩間公司的債券孳息睇睇,依家潤電一五年到期債trade2.9厘,潤燃二二年債則大約3.45厘,可以估計合併後,兩者融資成本未必慳得好多。

協同效益並不明顯

或者仲有硬頸之徒,認為合併後潤電可以發展天然氣發電之餘,亦可透過潤燃獲得開發煤層氣等上游業務的機會,但上游氣井開採從來係資本密集、回報期長兼風險大的生意,要一班存心想穩穩陣陣,揸住隻11倍多PE電力股的基金股東同你去博?難了。

睇番近十幾廿年,綜合能源企業唔太流行,基金鍾意揸電力股或者燃氣股,可以各適其適,唔需要綁埋一齊買豬肉搭豬骨,見上周五股價反應,令人懷疑六月EGM上,可唔可以獲得五成潤電及七成五潤燃獨立股東首肯,如果繼續隊,或者EGM前可以買嚟博合併「窩河」,博潤電報復式反彈。

首長國際不妨冷敲

上周資金追入落後股,民企股雨潤食品(01068)股價一周升28%,就連中國鋁業(02600)股價一周亦錄得12%升幅,真係好耐唔見有咁嘅場面!

雖然內地鋼鐵行業經營數據仍然差劣,但只要恒指繼續高企在23,000點樓上,相信遲早炒到鋼鐵股,正路當然是揀三隻H股——鞍鋼(00347)、馬鋼(00323)以及重鋼(01053),若想冷敲價細股,可留意首長國際(00697)。

古勝