v有「沽神」同「賺錢之神」之稱嘅普爾遜（John Paulson），雖然喺○七年貼中樓市泡沫，勁沽次按債券大賺40億美元，但「賺錢之神」近年頻頻睇錯市！繼舊年估錯美股會大跌同埋歐元會崩潰之後，今年普爾遜又睇錯黃金走勢，前排金價大跌令佢又蝕一大筆。雖然買金輸咗錢，但佢近排就以近3,000萬美元出售喺美國科羅拉多州Apsen嘅豪宅。如果成功賣出，普爾遜足足可以賺到超過兩成！
今次普爾遜要賣嘅豪宅名為Aspen Lakes Ranch，喺一○年啱啱買入，係一個牧場連住宅嘅物業，佔地有成三公頃。大宅入面有主人房外，仲有七間睡房同一個電影院，附近有個近9,200方呎嘅牧場，仲有個私人沙灘，絲絲聽到都覺得好羨慕呀！
不過，坊間好多人想知點解普爾遜要賣咗間咁正嘅豪宅？唔通今鋪佢又好似當年次按危機前咁，睇淡樓市想鬆人？可能普爾遜都怕自己「講多錯多」，就透過旗下公司Paul&Co.嘅發言人表示，嚟緊自己將會搬入舊年從沙特阿拉伯嘅蘇丹王子手上，以4,900萬美元買入嘅「頂級筍盤」，同樣位於Aspen嘅物業Hala Ranch。
發言人仲話，普爾遜買咗Hala Ranch之後，喺屋入面進行裝修，近日先完工，仲將間屋改名為Star Ranch，所以先至會賣走上述嗰間豪宅。