內地一枝獨秀嘅出口數據連番畀外界質疑可信性，尋日又有內地媒體引述深圳一間電子出口企業嘅老總爆料，話最大嘅隱瞞手法係偽造出口去拎境外貸款嘅資格，再用呢筆錢去買啲銀行嘅短期理財產品，仲話經過多次「出口」同一批貨物嘅虛報手法之下，1,000萬元嘅貨物「出口」80次，就可以貢獻高達8億元嘅出口數據。
市場對於點樣走虛報漏洞都非常好奇，電子出口企業嘅老總就話喺成個熱錢套利嘅流程上面，偽造巨額貿易係成個流程嘅第一步，而最重要嘅係通過「內保外貸」呢個步驟去獲得外匯資金，佢話企業將自己產品賣番畀自己，拎住貨物貿易齊全嘅單據，要辦理「內保外貸」業務完全無難度。佢仲話，由於中港兩地銀行之間利率有差距，加上內地銀行五花八門嘅理財產品同埋人民幣升值加快，令一啲人用貿易渠道將境外嘅資金調到境內。
虛構貿易額度愈滾愈大，令到中國嘅出口數據增幅引起國際社會嘅關注。中國海關喺監管行動亦都開始升級。內地媒體引述深圳一間玩具企業嘅老細話，以前經濟唔好時，海關檢查比較寬鬆，令企業有空間去呃退稅，但依家基本每個貨櫃都要檢查。有深圳官員仲話，依家對福田保稅區等海關特殊監管區嘅企業做緊監測同埋整頓添！
余詩韻