「大平賣，有買趁手」！聯想集團（00992）竟然擺咗個大烏龍，將最新型號嘅筆記本電腦ThinkPad Edge Twist，以三折價錢大平賣，於是個個「瘋搶腦」，網站癱瘓收場！
ThinkPad Edge Twist原本零售價約10,000元，但網上標價竟然係2,580元！呢個消息喺前晚十點開始喺各大討論區同社交網站瘋傳，新貨賣到咁平，唔少網民都試圖登入網站搶「筍貨」，搞到聯想個網站都癱瘓埋。最後到第二日凌晨，聯想先將懷疑標錯價嘅貨品下架。
聽成功搶購嘅網民話，完成交易後真係收到聯想發出嘅確認電郵，上面嘅標價真係2,580元。更有人表示已經「大手入貨」，一口氣買咗廿部咁話！
其實聯想已經唔係第一次「益街坊」，三年前聯想網站都曾經將原價約900元嘅硬碟，錯誤標價成120元，同樣吸引大批人上網搶購。當時聯想就表示，唔會向成功購買嘅買家追討差價，唔知今次聯想係咪都會咁大方呢？