聯儲局主席伯南克帶領全球齊量寬，引發通貨膨脹，連自己都害埋！百物騰貴下，食物同磚頭價錢最早飆升，原來莘莘學子嘅學費同樣都升唔少，搞到伯老個仔，都要孭40萬美元學費債！
伯南克個仔依家喺紐約Weill Cornell Medical College讀緊醫科，除咗學費，仲有書簿費、生活費，加上當地平均6.8%至7.9%嘅高息，埋單40萬美元都幾昂貴！根據伯老喺聽證會披露，阿仔就快完成學業，但就會孭住40萬美元學生貸款。
美國一個醫科學校聯盟統計，現時四年制嘅私資醫學院學費超過27.8萬美元，而公共醫學院學費亦要20.7萬美元。
雖然學費兼貸款利息高，但仍然有好多人想投身做醫生，首次報讀醫科嘅學生由十年前2.4萬人增至舊年3.3萬人，事關美國對醫生嘅需求有增無減。
有指到咗二○二五年，美國人均年齡增長，會有再多3,200萬人喺醫療改革下需要醫療保障，國內將面對13萬名醫生供應嘅缺口，凸顯醫療服務不足嘅情況。
不過因為要還重債嘅關係，唔少醫科生都會捨棄普通科，而揀人工高好多嘅專科嚟做。