利豐（00494）去年「成績表」差強人意，已嚇走唔少投資者，不過，利豐班管理層勝在夠團結，無話大難臨頭各自飛。好似總裁兼行政總裁樂裕民（Bruce Philip Rockowitz），由○一年起出任集團執行董事至今，近兩年集團業績雖然失禮少少，但都無話失場，所以見佢去年全年份董事酬金，爬過晒主席馮國綸（William）頭，都可以理解。不過，呢啲係滯後數字，明年酬金肯定大倒退。
根據利豐公布嘅二○一二年年報，去年支付嘅酌情獎金，原來係依據一一年表現同服務而發放，即係話出年呢個時候睇到嘅年報，佢哋嘅酌情獎金，會依據一二年表現同服務而發放，咁就弊傢伙，一二年堪稱為利豐「最差一年」喎，Bruce呢份咁勁嘅酌情獎金，容乜易係最後一次風光。如果係，集團營運總監嘅馮裕鈞（Spencer）嗰份跳升逾兩倍嘅酌情獎金，都唔多樂觀。
Bruce去年薪金及津貼同對上一年無變，都係57.2萬美元，不過佢嗰份酌情獎金就大大話話勁升咗54.04%，至632.2萬美元，令整份酬金厚增46.66%至695.5萬美元，足足比William多咗236.5萬美元。
反觀William雖然去年五月榮升做集團主席，但去年全年整份酬金就略為減磅，輕咗3.22%至459萬美元。
余詩韻