蘋果公司創辦人喬布斯（Steve Jobs）生前最後一個大project，就係喺美國加州Cupertino興建蘋果新總部，佢心目中嘅總部，係好似UFO咁嘅太空船，簡約得嚟要靚，靚得嚟又要夠環保，代價就係嚴重超支，兼落成日期押後一年。
當初嘅預算係30億美元，最新估計係激增六成至50億美元！新總部分為六個主要建築：總部大樓、連接地下禮堂嘅大堂、四層高停車場、健身中心同兩座R&D實驗大樓，喬布斯仲話總部要有好多cafe，其中一間仲可以容納3,000人！
總部大樓係一幢四層高嘅巨型環狀設計建築物，外牆以6公里長嘅玻璃包圍，單係玻璃就已經要特登喺德國製造，用船運去加州。而大樓面積達280萬平方呎，相當於三分之二個五角大樓咁大，預計可以容納12,000名員工。
新總部好重視環保，喬布斯希望總部能夠自給自足，供應所有設施所需嘅電量，要做到喬布斯所想，「太空船」嘅天台會鋪上70萬平方呎嘅太陽能板，另外會大量植樹，將15英畝嘅加州草原搬到總部，種植7000棵樹。新總部係由英國建築商Foster & Partners設計，香港人最熟悉嘅應該係中環嘅滙豐總部同赤鱲角機場。
雖然新總部超支，但話晒都係喬布斯嘅心願，所以行政總裁庫克都話「喬布斯生前擺咗好多心機同愛落去，希望可以將整個設計做好啲！」
余詩韻