經濟報告、證券報告大家就睇得多喇，「七人欖球賽報告」你又聽過未？滙豐銀行搞搞新意，為即將舉行嘅賽事發表報告，內容唔係講投資，而係由分析師教路有咩酒好飲，同比賽期間點照顧老闆。
去七人欖球賽嘅球迷衣着無奇不有，但係報告就提示各位，同老闆一齊去捧場時要注意打扮，唔係驚破壞形象，而係驚着住奇特裝束太熱，仲有記住喺上晝十點前唔好飲咁多酒，如果老闆要出差，就要第二朝提佢趕去機場！
除咗股票之外，原來滙豐證券策略亞太區主管林傳英喺飲酒方面都有唔少推介o架！佢話開場前最好係飲布根地輕鬆吓，為咗配合賽事嘅興奮情緒，開場之後飲黑皮諾或者長相思就最啱啦，最後如果你支持嗰隊打贏波，咁就當然要開香檳慶祝啦！