自從雷曼兄弟○八年爆煲後，CFO Erin Callan就退下火線，唔再係華爾街嘅女強人。
近日，佢就喺《紐約時報》寫咗篇好轟動嘅文章，話自己好後悔以前淨係掛住工作，忽略咗家人同朋友；更加錯過生BB嘅黃金年齡，依家惟有接受人工受孕，希望有自己嘅小朋友。
Erin話，雖然有唔少年輕女士都欣賞佢，因為Erin為工作奮鬥咗廿年，更成為華爾街嘅女強人，而嚟緊二十年，又可以做番自己鍾意嘅事。
不過佢就話，以前嘅自己，除咗工作之外，乜生活都冇，就連放假都只會留喺屋企訓覺，完全冇平衡到工作同生活，一啲都唔值得大家羨慕。
Erin提到過去廿年嘅「非人生活」，例如每一日起身到瞓覺部電話都機不離身，以防有人搵佢；又話工作咁多年，肚餓嘅時候都唔會離開工作枱，要邊做邊食；就連生日都要去歐洲開會，冇得慶祝！絲絲聽到都覺得驚，Erin就話依家諗番都覺得之前太過極端！
不過令Erin最後悔嘅係，自己過分投入工作，搞到錯失生仔大好時機。
喺雷曼事件之後，佢同丈夫離婚，一一年再婚，成為兩個小朋友嘅繼母，但係佢始終想有自己嘅BB，但現年47歲嘅Erin已經過咗生仔黃金年齡，惟有利用科技幫忙，希望透過人工受孕可以有BB。
余詩韻