忙於出書 無暇澄清
不過發生咁大件事，點解都未見有其他媒體報道呢？絲絲查番消息來源，原來呢個消息係由美國嘅《The Daily Currant》新聞網站傳出，佢哋出名發布「設計新聞」，旨在諷刺時弊咁話。
絲絲睇完篇假新聞都覺得幾逼真，就連克魯格曼負債734.6萬美元、資產淨值3.3萬美元等數據都寫得出。報道更加分析指出，克魯格曼「最大嘅錯誤」係○七年喺紐約投資房地產，幾個月之後就貶值咗四成，仲係佢負債纍纍嘅元兇添。
內地就有媒體好心幫克魯格曼澄清，相關記者仲話，之前喺紐約見到克魯格曼忙住宣傳自己本新書，搞到分身乏術，連澄清都無時間喎。
余詩韻