中電控股（00002）二月尾宣布舊年全年業績，盈利麻麻哋，倒跌10%，但無損主席米高嘉道理嘅信心，一公布完業績，幾乎日日增持股份，買到唔停得手，計計埋埋買咗650萬股，涉資4.3億元。
中電喺二月廿五日公布業績，電王米高即刻喺第二日入貨，少少哋50萬股，之後愈買愈多，最多嗰日有160萬股，八個交易日之中，七日有入貨，增持嘅650萬股，值4.3億元，對佢嚟講濕濕碎。
呢批增持股份，仲可以收埋股息，以每股末期息0.96元計，收到640萬股息。除咗米高之外，中電兩名非執行董事利約翰及麥高利，都用實際行動表示支持，呢兩位都係幾乎日日增持股份。
佢哋尋日仲公布埋一項人事調動，非執行董事謝伯榮將喺今年四月三十日股東周年大會後退任，但會繼續擔任公司兩間全資附屬公司（中電地產及嘉賀地產）董事。
佢依家為中電地產，繼續提供有關物業及地產方面嘅顧問服務，時薪3,200元，按實際時數為基準計算，任期將於今年五月十五日屆滿，但於雙方同意下可續約。
其實早喺舊年五月，謝伯榮由執董轉為非執董嘅時候，就簽咗呢份顧問合約，佢舊年退休嘅時候，先至得61歲，既然佢有咁高資歷，唔好浪費吖。
余詩韻