行行出炒神：炒手瓣數多贏錢靠「簡」

Clement所打理的業務廣泛，包括賓館、投資班及市場策劃等，雖然工作十分忙碌，每天仍把握「黃金兩小時」研究市況，包括開市一小時，下午開市以及尾市各半小時。

百萬落場 目標年贏40%

Clement現時以大約一百萬元本金炒股，並且訂立每年40%回報的目標。這個目標看來並不容易，但Clement卻非常有信心，笑言去年投資回報更達六成。他指出：「要持續喺股票市場獲利，只須重複簡單、正確的投資策略。」

何謂簡單正確的投資策略？Clement表示：「我唔會用好複雜嘅方法研究股票，我相信如果你睇圖夠多，都一定培養到感覺，畀你確認隻股票係強定弱？處於下跌定回升周期？」

嚴選主題 攻守要平衡

睇分析圖以外，Clement還會用生意人的頭腦去了解上市公司的基本面。「最重要係間公司嘅業務容易理解。你明唔明佢靠咩搵錢？係咪持續賺到錢？」

用簡單的方法分析市場，並且嚴選主題，是Clement投資的不二法門。一○年他賺得過倍回報，原因就是買中主題。「當年我嘅主題係本地零售股，單係一隻Joyce（00647）我用咗六位數字本金去買，升咗四倍！仲有數碼通（00315）等流動電訊股同新意網（08008）呢啲概念股，回報都相當唔錯。」

Clement炒功一絕，連○八年金融海嘯都逃過一劫。原來，Clement○七年年尾已經開始將股票套現，○八年僅留一成資金試水溫，利用散戶調配資金的靈活性，跑贏基金經理。

不過他坦言，自己炒股當然亦有輸過，但要做到每年埋單穩賺，倉位分配非常重要。他的做法是將超過一半的資金投資在優質防守性股份，例如九倉（00004）、港鐵（00066）等，餘下不足五成的資金，則會捕捉個別有炒作空間的高增長股份，這樣才可穩守突擊，不至於盲目炒作。

今年吼AH差價民生股

至於今年的主題是甚麼？Clement話今年可以炒AH差價以及本地民生相關股份。「H股相對A股有明顯折讓的如經緯紡機（00350）、海信科龍（00921）都已經跑出咗，睇到資金追捧緊呢啲股份，可以留意一下H股相對其A股折讓四成以上嘅股票。」

「另外，今年仲有一個可以行足全年嘅主題，就係關乎本土民生嘅股份，例如大家樂（00341）、大快活（00052）、稻香控股（00573）等，我睇到民生各樣開支加幅強勁，雖然薪金、食材成本亦跟住上漲，但連個人遊都落嚟同我地搶民生用品，幫襯快餐店成為大陸遊客嘅生活態度，民生相關股份中長線有上升空間。」

總括而言，Clement話要投資致富，認識股票市場之外，了解自己、建立自己一套投資策略亦相當重要，這樣才可知己知彼、百戰百勝！

「滾雪球」要夠本錢

股神巴菲特曾經提到：「人生如滾雪球，重要的是發現濕雪和長長的山坡。」但梁帥聰（Clement）覺得：「唔係每一個人都好似巴菲特咁，夠錢滾雪球。」

Clement以一百萬元本金投資，若每年取得40%回報，資產累積的速度亦算不俗，相信雪球終會愈滾愈大。但他認為，本金要夠大才有資格滾雪球，自己則較着重現金流，他會將股票市場得來的回報投放在其他事業上，包括尋覓舊樓改裝成賓館出租、開辦投資班賺取學費等，務求讓自己賺進穩定的現金。

打工難出頭 決心自立

事實上，當廿來歲時，Clement亦與芸芸畢業生一樣，安分守己做個打工仔。然而，隨着年紀及見識增長，令他深感香港地做打工仔前途黯淡。「我以前喺外資公司做嘢，睇住北京分行個同事，人工比我低五成，但睇嘅市場係我嘅五倍，我知道香港員工嘅價值愈來愈低，於是決定要試下自己做老闆。」

所謂「三十而立，四十而不惑」。今年三十六歲的Clement驀然回首，娓娓地說：「好難想像如果我無喺三十歲自立門戶，四十歲嘅我到底會係點。」