Market Insight：電訊設備股有優勢

美銀美林為，首兩個月內地數據顯示，經濟復甦的不確定性唔少，雖然樓價回升及通脹復燃兩大因素影響，估計人民銀行的貨幣政策只會由寬鬆微調至中性，人行唔會有過急的收水動作。

昨日港股微跌1點報收23,090點，單看跌幅，或者不覺市況兇險，實際二三線股中，重災區新能源股跌到一仆一碌。古勝昨日話守得住10日線可以追的金風科技（02208），話口未完已經失守，仲要插低近7%收市，興業太陽能（00750）及順風光電（01165）分別隊低16.8%及10.8%，近期升幅幾近化為烏有。

放大圖片

放大圖片

光伏股被潑冷水

電影《孖展風雲》裏面飾演金融大鱷的Jeremy Irons戲中金句，若要在金融市場上，做長勝將軍，係需要三大特質：be first,be smarter or cheat（要做先來者、最叻或者使詐）。

上星期溫總指國家要重點發展潔淨能源，新能源股炒一浸上去之後，高位吽吽豆豆無消息配合再炒上去，昨日中金分析員份簡報，真係be first，向光伏股開出第一槍，掀動新能源股骨牌照清洗。

中金認為，近日發改委定價機制對光伏電力供應的定價令市場失望，配合近日歐盟等中國光伏產品實施進口登記，以及第二季前預期光伏行業無乜好消息出籠，建議套裝沽出近期升幅唔少的光伏及風電股獲利，本來升得多掉頭被唱淡常見，但碰啱個市水盡鵝飛，威力大增，由昨日沽盤之大，睇嚟光伏股可能要靜番一陣至有翻炒機會。

電訊設備股是今年心水股，近日工信部更打開口牌，話中國4G牌好事近，坊間估計，4G投資直接拉動通訊產業鏈，包括基站建設等投資，可以高達5,000億元（人民幣‧下同），對剛捱過兩年固定投資期萎縮的設備公司，當然磨拳擦掌，等待發牌接單之日降臨。

4G受惠股要識揀

電訊商及電訊設備公司的股價，已開始預告行業周期的變化，大弱勢的中興通訊（00763）及京信通信（02342），去年分別累積跌46%及55%，年初至今卻反彈6%及2%，反之三大電訊商中移（00941）、中國聯通（00762）及中電信（00728）今年卻跌6.3%、10.5%及5.1%。

內地3G滲透率去年底突破兩成，三間電訊商3G由投資期進入收成，本周四同下周三、四，中移、中電信及聯通會分別公布一二年業績，估計中移業績持平，核心盈利1,260億元，中電信及聯通則分別賺148.1億元及69.4億元。

業績數字出入應該有限，重點反而是未來4G的固定開支預算，虛擬網絡經營商（MVNO）亦加入戰團，對三大巨頭影響。中移剛在兩個城市，包括深圳及廣州開展4G體驗服務，意想不到仲係計劃中，未來將會建造20萬個TD-LTE基站，耗資達1,800億元，遠超市場預期，相信也是中移近日弱勢的成因之一，訂造全球觸有的TD-LTE設備，確實代價不菲，會否拉動中移營運成本，未來派息政策是業績發布中的亮點。

不過，若畀古勝再揀，都會傾向設備股多於電訊商，估計喺未來六至十二個月，一強一弱的形勢會持續落去。

加強防守減風險

市場對下月起居內地港澳台人士可買A股嘅消息表現克制，畢竟涉及人數僅數十萬人，且並非個個都有興趣投資A股，資金規模亦受外匯管制所限，券商股只係早段威過一浸就掉頭。

反而，港人等到頸都長的「港股直通車」就遲遲未見蹤影，港樓又被特區政府落緊箍咒，股、樓都冇得炒，缸邊友要隨時有心理準備要捱下淡靜日子，暫時可將部分資金泊在防守性股份避險，例如兩電（中電（00002）及電能實業（00006））以及領匯（00823），其中領匯股價自去年十一月以來一直受制於43港元，且看呢轉能否順利破頂！

古勝