胡潤研究院尋日公布年度全球富豪排名榜，長實（00001）主席李嘉誠繼續以320億美元資產，穩坐大中華區首富嘅寶座，全球排名都由舊年嘅13位上升去到第7位，排第二嘅係恒地（00012）主席李兆基，第三位就由新地（00016）郭氏家族奪得。
至於68歲嘅娃哈哈董事長兼總經理宗慶后，就以130億美元成為內地首富，不過喺大中華地區排名只得第六。
今年胡潤富豪榜將上榜門檻由100億美元急降到10億美元，上榜人數即時由舊年唔夠100人暴漲到過千人，胡潤仲話，其實真正身家過10億美元嘅富豪，全球計埋應該有4,000人，不過當中大部分「隱咗形」冇上榜。
另一個幾「養眼」嘅排名榜，就係《福布斯》嘅「2013年亞洲50大商業女性名單」，榜內女企業家有16個係來自內地及8個來自香港。當中包括玖紙（02689）主席張茵、金利豐（01031）朱太，同埋龍湖（00960）主席吳亞軍等。
朱太話雖然入榜都好開心，但覺得要低調些，因為有壓力，佢仲話早一日已收到福布斯嘅電話，確認一下佢啲個人資料。朱太得獎，撞啱又係八大經紀團體春茗大日子，朱太以一身粉紅色唐裝打扮出瑒，非常搶鏡！
余詩韻