絲絲講場：滙豐拉隊銅鑼灣拜年
趁仲係新正頭，尋日滙豐銀行香港區總裁馮婉眉（Anita）同幾位高層，帶埋兩隻醒獅去百德新街分行向員工同啲客拜年，大派利是之餘仲有燒豬食，真係共慶歡樂年年！
Anita話畀咁啱路過嘅絲絲知，原來尋日初六係好日，佢哋擇好良辰喺朝早十點先開始舞獅。
切燒豬兼派利是
舞完獅之後，Anita、零售銀行及財富管理業務主管施穎茵（Diana）同零售銀行及財富管理服務零售網絡主管韓克強（Andy）就一齊拉開揮春，「迎春接福」、「吉祥如意」呀咁，祝各位有個大吉蛇年。
之後就到切燒豬嘅重頭戲喇，見到隻豬色澤鮮艷，絲絲同Diana佢哋已經食到嘴Lam Lam，更加驚喜嘅係，原來Anita喺第二邊開始向員工同啲客派利是，絲絲當然有份o架喇，人人有份、永不落空丫嘛，唔知今年Anita派幾多錢利是呢？
走嘅時候，Anita仲話原來佢哋舊年喺旺角分行搞拜年活動，今年轉場去港島區搞無咁悶喎，至於出年會喺邊度，就要賣個關子先！