絲絲講場：孫道弘早婚有預謀
絲絲新年時最鍾意講恭賀說話，不過嗰次同中港照相（01123）行政總裁孫道弘（Stanley）拜年，一時間諗唔到講咩好，點解？皆因Stanley三十出頭，就已經係一家市值近10億公司嘅掌舵人，加埋一個幸福家庭，你話絲絲可以再點樣錦上添花呢？
早搏完 退休遊世界
當絲絲問Stanley人生仲有咩係冇嘅呢？佢望望身邊嘅靚老婆同埋兩個得意囡囡，笑笑口話：「我好慶幸自己早結婚、生細路，依家多啲嘢煩，遲啲少啲嘢煩。煩只係喺人生嘅某一啲階段，係遲早嘅分別。」查實佢一早有計劃，將來退休嗰時啲細路已經大個晒，仲可以有氣有力咁遊歷世界。原來係想早啲搏完早啲上岸，都算係單筍deal吖！
回味下廚痛快感覺
絲絲記得Stanley好鍾意煮嘢食，仲講過以前好享受喺餐廳廚房做嘢時忙到好似打仗嗰種痛快。不過今時唔同往日，佢話：「我有兩個女，唔想要咁緊張嘅生活，廿幾歲嗰時未結婚，我係好享受（打仗），依家要過呢啲生活就太有壓力。」不過佢依然耐唔耐會下廚，好似上年就整咗次有八道菜嘅十人餐拍賣，為書伴我行（香港）基金籌咗8.8萬。
余絲韻