歎慣免費WhatsApp，一話Android版收年費，只係區區0.99美元（約7.7港元）就引發媽聲四起，繼WeChat後，LINE都加入「抽水」行列，大家咁落力「抽水」，無非為咗爭客。
WhatsApp呢0.99美元年費，即時引發了IM（即時通訊）軟件爭客戰，WhatsApp嘅主要對頭，開發LINE嘅韓國科企NHN就話，LINE近日喺本港嘅新登記人數急升兩倍，不禁使人慨嘆手機APP（應用軟件）嘅用戶歡迎程度嘅轉變，隨時大過二三線股嘅股價上落速度！
對於WhatsApp要收年費，絲絲其實並無反感，事關作為軟件開發商，用其所謂Small is Beautiful收取小額年費獲取回報，其實無可厚非。而從另一角度去睇，LINE借機搶客，正好反映互聯網世界自由開放嘅好處！
用戶急升「以行動說不」
LINE開發者NHN再次走出嚟高調宣傳，甚至明言本港新用戶急升「是以行動向競爭對手說不」，其實係為佢全面拓展香港市場做好準備，事關繼傳媒爆料話HNH積極尋求同本港電訊商合作後，LINE尋日又表明會於今年稍後，喺香港推出一連串有趣宣傳推廣計劃。睇怕大家唔使幾耐，就會見到「兔兔」、「饅頭人」同「熊大」等LINE嘅Emoji公仔，喺香港不同宣傳渠道出現！
余絲韻